एजेन्सी, ७ कात्तिक । उन्नाइस वर्षीया एक किशोरीलाई जिउँदै जलाएर हत्या गरेको अभियोगमा बंगलादेशको अदालतले १६ जनालाई मृत्युदण्डको सजाय सुनाएको छ ।

बिहीबार बंगलादेशको अदालतले १९ वर्षीया किशोरी नुसरत जाहा राफीको हत्या गरेको अभियोगमा १६ जनालाई फाँसीको सजाय सुनाएको हो । फाँसीको सजाय पाउनेमध्ये २ जना सत्तारुढ दल अवामी लिगका स्थानीय नेता समेत रहेका छन् ।

अदालतले नुसरतको हत्यामा संलग्न रहेको अभियोगमा उनी पढ्ने विद्यालयका प्रधानाध्यापकसहित ३ जना शिक्षक र उनीसँगै पढ्ने २ जना छात्रालाई समेत मृत्युदण्ड दिने फैसला गरेको छ ।

अदालतले विद्यालयका प्रधानाध्यापक सिराज उद दौलासहित ३ जनाले नुसरतलाई मार्ने आदेश दिएको भन्दै उनीहरुलाई मृत्युदण्डको सजाय सुनाएको हो ।

यौन दुर्व्यवहारको उजुरी फिर्ता लिन नमानेपछि गत अप्रिल ६ गते नुसरतलाई विद्यालयको छतमा जिउँदै जलाइएको थियो । गम्भीर घाइते नुसरतको उपचारका क्रममा मृत्यु भएको हो ।

नुसरतको मृत्यु भएपछि बंगलादेशभर व्यापक विरोध भएको थियो । उनको हत्यामा संलग्नलाई कारबाही गर्नुपर्ने भन्दै मानिसहरु सडका उत्रिएका थिए ।

उनी पढ्ने विद्यालयको छतमा लगी नुसरतलाई मट्टितेल छर्केर आगो लगाइएको र ४ दिनपछि उनको ज्यान गएको थियो ।

नुसरतले आफू पढ्ने विद्यालयका प्रधानाध्यापकले यौन दुर्व्यवहार गरेको उजुरी दिएकी थिइन् । तर उजुरी फिर्ता लिन नमानेपछि उनलाई जिउँदै जलाइएको हो ।

नुसरतलाई उक्त उजुरी फिर्ता लिन भन्दै उनका साथी र समुदायका केही प्रभावशाली व्यक्तिले दबाब दिएका थिए । तर उजुरी फिर्ता लिन नमानेपछि उनलाई उनका साथीसहितको एक समूहले जिउँदै जलाएर हत्या गरेको थियो ।

राफीका आफन्तले अदालतको फैसलाबाट खुसी भएको र अभियुक्तलाई तत्काल फाँसीमा चढाउनु पर्ने बताएका छन् ।

यसरी जिउँदै जलाइएको थियो नुसरतलाई

गत अप्रिलमा राजधानी ढाकादेखि १६० किलोमिटर टाढा रहेको फेनी नामक सहरमा नुसरतलाई जिउँदै जलाइएको हो । दुर्व्यवहार भएको उजुरी दिएको ११ दिनपछि उनलाई जिउँदै जलाइएको थियो ।

गत अप्रिल ६ गते सबैभन्दा पहिला नुसरतलाई लछारपछार पार्दै विद्यालयको छतमा लगियो । त्यसपछि बुर्का लगाएका ४/५ जनाको समूहले उनलाई घेरा हाले । त्यसपछि ती व्यक्तिले प्रधानाध्यापकविरुद्धको उजुरी फिर्ता लिन नुसरतलाई दबाब दिएका थिए ।

तर उजुरी फिर्ता लिन नमानेपछि उनीमाथि मट्टितेल छर्केियो र आगो लगाइयो । आगोबाट उनको शरीर ८० प्रतिशत जलेको थियो । उपचारका क्रममा ४ दिनपछि उनको मृत्यु भएको थियो ।

अभियुक्तले सुरुमा नुसरतले आत्महत्या गरी आफैं मरेको भन्ने योजना बनाएका थिए । तर आगो लागेपनि उनी त्यहाबाट भाग्न सफल भएकी थिइन् । आफ्नो शरीर पूर्णरुपमा जलेको थाहा पाएपछि उनले आफ्ना दाजुको फोनमा  बेहोस हुनुपूर्व बयान रेकर्ड गरेकी थिइन् ।

नुसरतले आफ्नो बयानमा आफूमाथि आगो लगाउनेको नाम समेत बताएकी थिइन् । ‘शिक्षकले मलाई जबर्जस्ती गरेको हो, यो अपराधका विरुद्ध सास रहुञ्जेल लड्ने छु’, उनले उक्त बयानमा भनेकी थिइन् ।